Иртнĕ кунсенче районти тĕп культура çур-тĕнче "Островок" ташă ушкăнне çỹрекенсем хăйсен пултарулăхĕпе паллаштарнă. Мероприятие республикăри Амăшĕпе Ашшĕн çулталăкне халалланă.

 Тĕрлĕ çулсенчи - шкул çулне çитмен тата вунсакăр çул тултарман каччăсемпе хĕрсем - сцена çинче чăваш, вырăс, тутар халăх юррисемпе савăнтарнă, ташшисемпе чунсене тыткăнланă. Юхнă юрă-кĕвĕ, шăнкăрти сиплĕ шыв евĕр чĕресене вырнаçса кашнин кăмăлне уçнă. Хитре те ятарлă сцена костюмĕсем тăхăннă ачасем курма килнисене хăйсене тытма пĕлнипе тĕлĕнтернĕ. Çĕнĕ ташăсем, çĕнĕ ятсем, çĕнĕ талантсем... Темиçе çул хореографи ушкăнне çỹрекенсен ташă ăсталăхĕ чăннипех те çỹллĕ шайра. Вĕсем хăйсене чăн-чăн профессионал артистсем пек тытнă.

 Чăваш Республикин культурин тава тивĕçлĕ ĕçченĕ Татьяна Иванова хореографăн тỹпи ачасен çитĕнĕвĕнче пысăк. "Утравĕ" чăнах та çирĕп. Çĕнĕ талантсем, апла пулсан, пирĕн татах та нумай пулĕç тесе шансах тăратпăр.

 Источник: "Каçал Ен"